Даатгалын гэрээг бичгээр байгуулаагүй үндэслэлээр нэхэмжлэлийн шаардлагыг хангах үндэслэлгүй

Шүүхийн нэр: Хан-Уул дүүргийн Иргэний хэргийн анхан шатны шүүх

           Шүүхийн шийдвэрийн огноо, дугаар: 2024 оны 05 сарын 13-ны өдрийн   183/ШШ2024/02115

           Тоймын дугаар, огноо: 2024 оны 6 дугаар сарын 26, дугаар №04

Шийдвэрийн төлөв: Хүчин төгөлдөр болсон

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

   Агуулга: Нэхэмжлэгч М даатгал ХК хариуцагч А-д холбогдуулан Даатгалын гэрээний хураамж 551 600 төгрөг гаргуулах нэхэмжлэлийг гаргасан.

Нэхэмжлэгч нэхэмжлэлийн үндэслэлээ “Талуудын хооронд 2020 оны 12 сарын 26-ны өдрөөс 1 жилийн хугацаатайгаар … дугаар Эрүүл мэндийн даатгалын гэрээг байгуулж, даатгуулагч А нь 788 600 төгрөгийн даатгалын хураамжийг Даатгагчид төлөхөөр тохиролцож, эрсдэлээ даатгуулсан. Гэрээний хугацаанд 1 удаа нийт 587 447 төгрөгийн нөхөн төлбөр авч байсан. Гэтэл 2020 оны 12 сарын 30-ны өдрөөс 2021 оны 03 сарын 05-ны өдөр хүртэлх хугацаанд нийт 236 400 төгрөгийн даатгалын хураамжийг төлсөн боловч үлдэгдэл 551 600 төгрөгийн даатгалын хураамжийг төлөөгүй” гэж тайлбарласан.   

Хариуцагч А нь “М даатгалын нэхэмжлэл гаргасан төлбөрийг хүлээн зөвшөөрөхгүй байгаа бөгөөд тус гэрээ нь хийгдсэн, гарын үсэг зурагдсан нь тодорхойгүй.” гэж маргажээ. 

Иргэний хуулийн 431 дүгээр зүйлийн 431.3-т “Хуульд өөрөөр заагаагүй бол даатгалын гэрээг бичгээр хийх бөгөөд энэ шаардлагыг хангаагүй гэрээ хүчин төгөлдөр бус байна.” гэж заасан байна.

Иргэний хэргийн анхан шатны шүүх нэхэмжлэгч М даатгал ХК-ийн нэхэмжлэлийн шаардлагыг хэрэгсэхгүй болгож шийдвэрлэв.

Учир нь, М даатгал ХК нь иргэн А-тай 2020 оны 12 дугаар сарын 26-ны өдөр эрүүл мэндийн даатгалын гэрээ байгуулсан үндэслэлээр шаардах эрхээ тодорхойлсон хэдий ч нэхэмжлэгчээс хэрэгт ирүүлсэн Даатгалын гэрээ нь бүрэн биш, уг гэрээнд талууд гарын үсэг зурж баталгаажуулаагүй байна.

Нөгөөтэйгүүр, нэхэмжлэгч талаас хариуцагч А нь гэрээг зөвшөөрсөн талаар мессэжээр илэрхийлсэн гэх цаасан дээр буулгасан мессэж бичсэн баримтыг ирүүлсэн хэдий ч уг баримтаар тухайн гэрээнд хариуцагч А-нь  гарын үсэг зурсан гэдгийг нотлох боломжгүй, энэ нь хэрэгт ач холбогдолтой баримт биш юм.

Эдгээрээс дүгнэхэд талуудын хооронд Иргэний хуулийн 431 дугаар зүйлийн 431.1-д заасан даатгалын гэрээ байгуулагдсан гэх үндэслэл тогтоогдохгүй байх тул гэрээний хураамжийг шаардах үндэслэлгүй гэж шүүх үзэв.

Шүүхийн шийдвэрийг бүтнээр харах цахим холбоос: https://shuukh.mn/single_case/135983?daterange=2024-01-01%20-%202024-06-26&id=1&court_cat=1&bb=1

Тоймыг бэлтгэсэн: Хан-Уул дүүргийн Иргэний хэргийн анхан шатны шүүхийн шүүгч Б.Мөнхжаргал