Шүүгчийн захирамжийн дугаар:183/ШЗ2022/18876
/хүчин төгөлдөр болсон/

“А”, “Б, С” нарт холбогдуулан шүүхэд нэхэмжлэл гаргасныг шүүх хүлээн авч, иргэний хэрэг үүсгэж, хэрэг хянан шийдвэрлэх ажиллагааг явуулж, шүүх хуралдааныг товлосон байна.
Шүүх хуралдаанд хариуцагчийн төлөөлөгч гэрчээр “Д”-г оролцуулах хүсэлт гаргаж, уг гэрчээс хэрэгт ач холбогдол бүхий хэд хэдэн зүйлийг тодруулна гэж тайлбарласан.
Нэхэмжлэгч А гэрч Д-г асуулгах хүсэлтийг дэмжсэн ба шүүх хариуцагчийн төлөөлөгчийн хүсэлтээр гэрч Д-г оролцуулах хүсэлтийг хангаж, тус шүүх хуралдааныг хойшуулсан байна.
Гэвч гэрч Д-г хүсэлтэд дурдсан хаяг болон холбоо барих утасны дугаараар хэд хэдэн удаа дуудаж, мэдэгдэх хуудсыг хүргүүлэх ажиллагааг хийсэн боловч гэрч Д нь заасан хаягтаа оршин суудаггүй, мөн холбоо барих утасны дугаар нь гэрчийнх биш гэсэн хариу ирсэн байна.
Харин хариуцагчийн төлөөлөгч гэрч Д нь бидний өгсөн хаягт амьдардаг бөгөөд заасан хаягт байгаа, шүүхэд ирэхгүй санаатайгаар зайлсхийж байгаа тул албадан ирүүлэх хүсэлтийг дараагийн шүүх хуралдаанд гаргасан ба шүүх хүсэлтийг хүлээн авч, хуульд заасан үндэслэл тогтоогдсон тул гэрч Д-г албадан ирүүлэхийг Цагдаагийн байгууллагад даалгасан захирамжийг гаргасан.
Уг захирамжийн дагуу гэрч Д-г албадан ирүүлэх ажиллагааг цагдаагийн байгууллага хийснээр гэрч Д шүүхэд ирж гэрчийн мэдүүлэг өгсөн ба гэрчээр дуудагдсан этгээд шүүхэд заавал хүрэлцэн ирэх ба үнэн зөв мэдүүлэг өгөх үүрэгтэй байдаг гэдгийг тайлбарлав.
Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

Хураангуй бэлтгэсэн: Хан-Уул дүүргийн Иргэний хэргийн анхан шатны шүүхийн шүүгч Б.Мөнхжаргал