Тус шүүхийн шүүгчдийн зөвлөгөөний 2020 оны 12 дугаар сарын 03-ны өдрийн 1231 дүгээр тогтоолоор гамшгаас хамгаалах өндөржүүлсэн болон бүх нийтийн бэлэн байдлын зэрэгт шилжүүлсэн үед Хан-Уул дүүргийн Иргэний хэргийн анхан шатны шүүхийн хэрэг хянан шийдвэрлэх ажиллагаа явуулах түр журмыг баталлаа.

            Уг журмаар гамшгаас хамгаалах өндөржүүлсэн бэлэн байдлын зэрэгт шилжүүлсэн үед шүүхэд хэрэг, нэхэмжлэл, гомдол, хүсэлт, нотлох баримтыг хэрхэн хүлээн авах тухай, нэхэмжлэлийн хувь гардуулах, хэргийн оролцогчдод эрх үүрэг тайлбарлах, хэргийн материал танилцуулах, шүүхээс гарсан эрх зүйн актыг танилцуулах, гардуулах ажиллагаа, хэрэг хянан шийдвэрлэх ажиллагаатай холбоотойгоор хэргийн оролцогчдоос шүүгчийн туслахтай харилцах журам, аргачлалын талаар болон шүүх хуралдааны бэлтгэл, зохион байгуулалтын талаар зохицуулсан болно.

            Журмын хүрээнд тус шүүхийн шүүгч тус бүрээр албаны цахим шуудан /мэйл/-ийн хаяг нээсэн бөгөөд тухайн шүүгчийн хэрэг хянан шийдвэрлэх ажиллагаанд байгаа хэрэгт ирүүлэх хүсэлт, тайлбар, бусад баримтыг цахимаар шүүхэд хүлээн авах, хэргийн оролцогчдод нэхэмжлэл, гомдол, тайлбар, шүүхээс гарсан эрх зүйн актын хуулбарыг цахимаар хүргүүлэх ажиллагааг уг цахим шуудангаар дамжуулан гүйцэтгэх юм.

            Иймд хэргийн оролцогч, шүүхээр үйлчлүүлэгч иргэд Та бүхэн дараах түр журамтай сайтар танилцаж, холбогдох шүүгч ажилтны утасны дугаар, цахим шуудан /мэйл/-ийн хаягаар холбогдон шүүхийн үйлчилгээг авна уу.

Түр журамтай танилцах бол ЭНД дарна уу.