Сөрөг нэхэмжлэлээр нэмж хариуцагч татахгүй

Захирамжийн дугаар:     2023 оны 10 сарын 15-ны өдөр Дугаар 183/ШЗ2024/21964

Захирамжийн төлөв:      Хүчин төгөлдөр болоогүй

Санамж: “Энэхүү тойм нь шүүгчийн захирамжийг орлохгүй, бөгөөд олон нийтийг мэдээллээр хангах зорилготой болно”.

Нэхэмжлэгч Б болон И нар нь хариуцагч С-д холбогдуулан үл хөдлөх эд хөрөнгийг түүний хууль бус эзэмшлээс чөлөөлүүлэх нэхэмжлэлийг гаргасан.

Хэргийг хэлэлцэх шүүх хуралдааны хүсэлт хэлэлцэх шатанд хариуцагч С-ийн итгэмжлэгдсэн төлөөлөгчөөс маргаан бүхий үл хөдлөх хөрөнгийн хууль ёсны өвлөгчөөр тогтоолгох, үл хөдлөх эд хөрөнгийн өмчлөх эрхийн гэрчилгээг гаргуулах, хууль ёсны дундын өмчлөгчөөр хариуцагчийг тогтоолгох, өвлөх эрхийн гэрчилгээг хүчингүйд тооцуулах агуулга бүхий сөрөг нэхэмжлэлийн шаардлагыг нэхэмжлэгч Б, И болон өвлөх эрхийн гэрчилгээ олгосон ...р тойргийн нотариатчид холбогдуулан гаргасан.

Иргэний хэрэг шүүхэд хянан шийдвэрлэх тухай хуулийн 73.1, 73.2-т зааснаар сөрөг нэхэмжлэлийн шаардлага нь үндсэн нэхэмжлэлийн шаардлагатай тооцогдох байвал шүүхээс бүрдүүлбэрийг шалгаж сөрөг нэхэмжлэлийг хүлээн авах зохицуулалттай.

Тус хэрэгт үндсэн нэхэмжлэгч нь Б болон И гэсэн 2 иргэн байх бөгөөд хуулийн дагуу сөрөг нэхэмжлэлийг зөвхөн нэхэмжлэгч нарт холбогдуулан гаргана, харин нэмэлтээр нотариатчийг хариуцагчаар татан сөрөг нэхэмжлэл гаргах боломжгүй юм.  

Иймд шүүхээс сөрөг нэхэмжлэлийг хүлээн авахаас татгалзаж, зөрчлийг арилгаж дахин сөрөг нэхэмжлэл гаргах эрхтэй болохыг, шаардлагатай бол нотариатчид холбогдуулан тусдаа нэхэмжлэл гаргаж шийдвэрлүүлэхэд уг  захирамж саад болохгүйг дурдаж шийдвэрлэлээ.

Хан-Уул дүүргийн Иргэний хэргийн анхан шатны шүүхийн шүүгч:        Б.Ганцэцэг